ԵՐԵՎԱՆ, 2 մարտի. /Նովոստի-Արմենիա/. Երևանի վարչության Մաշտոցի բաժնի Դավիթաշեն բաժանմունքի ՔՀ խմբի կրտսեր օպերլիազոր  Գևորգ Գրիգորյանին խուլիգանության մեղադրանք է ներկայացվել, երեքշաբթի «Նովոստի-Արմենիա» գործակալությանը հայտնեցին ՀՀ գլխավոր դատախազության մամուլի ծառայությունից:   

«Նախաքննությամբ պարզվել է, որ  ոստիկանության`  Երևանի վարչության  Մաշտոցի բաժնի Դավիթաշեն բաժանմունքի  ՔՀ խմբի կրտսեր օպերլիազոր  Գևորգ Գրիգորյանը 2009թ. դեկտեմբերի 18-ին` 03:20-ի սահմաններում, ալկոհոլի ազդեցության տակ,   «Օմեգա»    գիշերային ակումբի դիմաց  վիճաբանել է  հիշյալ ակումբի  անվտանգության աշխատակիցներ Տ. Հովակիմյանի և  Ռ. Կիրակոսյանի  հետ»,- ասվում է հաղորդագրության մեջ:

Ինչպես հայտնվում է, նա հայհոյել և իրեն ամրակցված  «Մակարով» տեսակի ատրճանակից  անկանոն 2  կրակոց է արձակել: 

Ձեռք բերված ապացույցների հիման վրա Գրիգորյանին  մեղադրանք է առաջադրվել  ՀՀ քրեական օրենսգրքի  258-րդ հոդվածի 4-րդ մասով:
Քրեական գործն  ուղարկվել է Երևանի Կենտրոն և Նորք-Մարաշ վարչական շրջանների ընդհանուր  իրավասության առաջին ատյանի դատարան` ըստ էության քննելու համար:-0-