ԵՐԵՎԱՆ, 4 մարտի. /Նովոստի-Արմենիա/. Հայաստանի կառավարությունը հինգշաբթի նիստում համաձայնություն է տվել 2010 թվականի սեպտեմբերին Հայաստանում «Արմենիա 2010» փրկարարների միջազգային վարժանքների անցկացման ծախսերը ծածկելու նպատակով արտաբյուջետային հաշվի բացմանը։
Ինչպես տեղեկացրեց Հայաստանի արտակարգ իրավիճակների նախարար Մհեր Շահգելդյանը, վարժանքները կանցկացվեն Հայաստան-ՆԱՏՕ համագործակցության շրջանակներում։
«Վարժանքներին կմասնակցի մոտ 50-60 երկիր և 1-1,2 հազար փրկարար։ Վարժանքների ֆինանսավորումը կիրականացվի Հայաստանի և ՆԱՏՕ-ի կողմից»,- ասաց նախարարը։
Ինչպես տեղեկացրեց Շահգելդյանը, վարժանքների անցկացման մանրամասները պարզ կդառնան այս հարցով մարտին կայանալիք խորհրդակցությունից հետո։
Վարժանքների անցկացման ծախսերի գումարն առայժմ հստակեցված չէ։ Դրանց անցկացման միջոցների կուտակման արտաբյուջետային հաշիվը բացվել է ING բանկում։ -0-
