ԵՐԵՎԱՆ, 18 մարտի. /Նովոստի-Արմենիա/. Սլովակիան ձգտում է պարզեցնել վիզային ռեժիմը Հայաստանի հետ, հինգշաբթի հայ-սլովակյան բիզնես-համաժողովի ժամանակ հայտարարեց Սլովակիայի արտգործնախարար Միրոսլավ Լայչեկը:
«Սլովակիան ընդգրկված է Շենգենյան գոտում, ղեկավարվում է եվրոպական միության ընդհանուր վիզային քաղաքականությամբ, այդուհանդերձ, մենք ցանկանում ենք նվազագույնի հասցնել Սլովակիա մուտքի արտոնագիր տրամադրելու հետ կապված տեխնիկական բարդությունները»,- ասաց Լայչեկը:
Նա նաև նշեց Հայաստանի հետ համագործակցության ակտիվացման նպատակով միջկառավարական հանձնաժողով ստեղծելու անհրաժեշտւթյունը:
Լայչեկը դրական գնահատեց Հայաստանի և Սլովակիայի միջև քաղաքական և տնտեսական երկխոսության մակարդակը: Նա նաև երկրների միջև տնտեսական համագործակցության խորացման գործում կարևորեց Սլովակիայի դեսպանատան դերը Մոսկվայում:
«Համագործակցության հետագա ամրապնդման համար առաջարկվում է նման բիզնես-համաժողով անցկացնել Բրատիսլավայում հայ պաշտոնատար անձանց այցի ժամանակ և հատուկ միջոցառումներ կազմակերպել Մոսկվայում Սլովակիայի դեսպանատանը»,- ասաց Սլովակիայի ԱԳ նախարարը:
Լայչեկը նաև կարևորեց Արևելյան գործընկերության ծրագրերը, որոնք թույլ են տալիս պարզեցնել վիզային ռեժիմը մասնակից երկրների հետ և ազատականացնել տնտեսությունը:
ԱԳՆ ղեկավարը համաժողովի մասնակիցներին հաջողություն և արդյունավետ աշխատանք մաղթեց
«Զարգացման հայկական գործակալությունը» հայ-սլովակյան բիզնես-համաժողովը կազմակերպել էր Սլովակիայի արտգործնախարար Միրոսլավ Լայչեկի Հայաստան կատարած պաշտոնական այցի շրջանակներում:
Համաժողովի բացմանը ներկա էին Հայաստանի և Սլովակիայի արտգործնախարարները, Հայաստանում Սլովակիայի դեսպան Ժոզեֆ Միգաշը (նստավայրը՝ Մոսկվա): Պատվիրակության կազմում էին սլովակ ձեռներցներ:
Համաժողովի շրջանակներում ներկայացվեցին «Հայաստան – ներդրումային միջավայր» և «Սլովակիայի Հանրապետության տնտեսական ներուժը», որոնք ներկայացրեցին ԶՀԳ տնօրեն Ռոբերտ Հարությունյանը և Սլովակիայի ներդրումների և առևտրի զարգացման գործակալության ռազմավարական ծրագրերի տնօրեն Ալեքսանդր Ակուրլան:
Հայաստանի և Սլովակիայի միջև ապրանքաշրջանառությունը 2009թ. կազմել է ավելի քան $10,4 մլն, արտահանումը՝ $124 հազ, ներկրումը՝ $10,2 մլն.:--0--
