ԵՐԵՎԱՆ, 30 մարտի. /Նովոստի-Արմենիա/. Լեռնային Ղարաբաղի հարցով ԵԱՀԿ Մինսկի խմբի (ՄԽ) համանախագահներ Յուրի Մերզլյակովը, Բեռնար Ֆասիեն և Ռոբերտ Բրադտկեն մարտի 26-29-ը Հայաստան և Լեռնային Ղարաբաղ կատարած այցի արդյունքում համատեղ հայտարարություն են արել, որում նշել են, մասնավորապես, Մադրիդյան սկզբունքների շրջանակներում խաղաղ կարգավորման հասնելու՝ հակամարտության կողմերի հավատարմությունը:
«Համանախագահների և հակամարտության կողմերի միջև Փարիզում և տարածաշրջանում վերջերս կայացած հանդիպումներից հետո համանախագահները գոհունակությամբ նշում են կողմերի հավատարմությունը Մադրիդյան սկզբունքների շրջանակներում հակամարտության խաղաղ կարգավորման հասնելու պարտավորությանը»,- ասվում է երեքշաբթի ԵԱՀԿ պաշտոնական կայքում տեղադրած փաստաթղթում, հաղորդում է «ՌԻԱ Նովոստին»։
Փաստաթղթում ասվում է նաև, որ համանախագահները տարածաշրջան կատարած այցի ընթացքում հանդիպումներ են ունեցել Հայաստանի նախագահ Սերժ Սարգսյանի և արտաքին գործերի նախարար Էդվարդ Նալբանդյանի հետ, որոնց ընթացքում քննարկվել են հայկական կողմի առաջարկները ղարաբաղյան հակամարտության խաղաղ կարգավորման հիմնական սկզբունքների վերաբերյալ։ -0-
