ԵՐԵՎԱՆ, 21 հուլիսի./Նովոստի-Արմենիա/. Ներկայիս փուլում հայ-թուրքական հարաբերություններում նոր զարգացումներ պետք չէ ակնկալել, այդ կարծիքին է Հայոց ցեղասպանության ինստիտուտ-թանգարանի տնօրեն, պատմաբան Հայկ Դեմոյանը։
«Հայ-թուրքական հարաբերությունները տարածաշրջանային գործընթացներից կտրված դիտարկելն արդեն անիրական է։ Հայ-թուրքական հարաբերությունները չեն կարող այլևս զարգանալ տվյալ փուլում՝ երկու հիմնական պատճառներով. հարաբերությունների զարգացումն անխուսափելիորեն ադրբեջանաթուրքական հարաբերությունների սրման կհանգեցնի, և երկրորդը՝ Թուրքիայում սրվել է քրդական հարցը»,- չորեքշաբթի մամուլի ասուլիսի ժամանակ ասաց Դեմոյանը։
Նա ընդգծեց, որ Թուրքիային էներգետիկական գործոնի պատճառով շահավետ չէ Ադրբեջանի հետ հարաբերությունները վատացնել։
«Ինչ վերաբերում է քրդական խնդրին, ապա Թուրքիայի արևելքում, այսինքն Արևմտյան Հայաստանի տարածքում, ինտենսիվ ռազմական բախումներ են տեղի ունենում։ Դա շատ վտանգավոր զարգացում է։ Այդ պատճառով նման պայմաններում Թուրքիային անհրաժեշտ է իր արևելյան սահմանները փակ պահել»,- նշեց փորձագետը։ -0-
