ԵՐԵՎԱՆ, 31 օգոստոսի. /Նովոստի-Արմենիա/. ՌԴ արտակարգ իրավիճակների նախարար Սերգեն Շոյգուն շնորհակալական նամակ է հղել ՀՀ ԱԻՆ-ին Ռուսաստանում բռնկված հրդեհների մարման գործում Հայաստանի ցուցաբերած օգնության համար, երեքշաբթի լրագրողներին ասաց Փրկարար ծառայության ղեկավարի խորհրդական, «Արտակարգ ալիք» տեղեկատվական կենտրոնի ղեկավար Նիկոլայ Գրիգորյանը:
«Պաշտոնական նամակի վերջում Շոյգուն ձեռագիր գրել է «շնորհակալություն» բառը», - ասաց Գրիգորյանը՝ նշելով, որ Սերգեյ Շոյգուի և ՀՀ ԱԻՆ ղեկավար Արմեն Երիցյանի միջև սերտ, բարեկամական հարաբերություններ են հաստատվել:
Գրիգորյանի խոսքերով՝ շնորհակալագիր է հղել նաև Մորդովիայի հայկական համայնքը, որի տարածքում հայ փրկարարները հրդեհների մարման աշխատանքներ էին իրականացնում:
Օգոստոսին Հայաստանից չորս հրշեջ-փրկարարական մարտական հաշվարկներ էին գործարկվել Մորդովիայում անտառային հրդեհների մարման գործում: Հայ փրկարարների գործողությունները տեղական իշխանությունների բարձր գնահատականին են արժանացել:-0-
