ԵՐԵՎԱՆ, 1 փետրվարի. /Նովոստի-Արմենիա/. Հայաստանի և Ռուսաստանի տրանսպորտի նախարարները՝ Մանուկ Վարդանյանը և Իգոր Լևիտինը, փետրվարի 6-7-ը Երևանում ռուսական պատվիրակության այցի ընթացքում բեռնափոխադրման և ուղևորափոխադրման հարցեր կքննարկեն:
ՌԴ տրանսպորտի նախարար, ՌԴ-ի և ՀՀ-ի միջև տնտեսական համագործակցության միջկառավարական հանձնաժողովի ռուսական մասի նախագահ Իգոր Լևիտինն այցի շրջանակներում Երևանում կհանդիպի ՀՀ վարչապետ, Միջկառավարական հանձնաժողովի հայկական մասի նախագահ Տիգրան Սարգսյանի հետ:
«Հիմնականում նախարարի այցը պայմանավորված է միջկառավարական հանձնաժողովի շրջանակներում համագործակցության հարցերով: Բայց, բնականաբար, նաև կքննարկվեն երկու գերատեսչությունների միջև գործնական հարցեր, մասնավորապես՝ ուղևորափոխադրման, բեռնափոխադրման և երկաթուղային փոխադրումների ոլորտի հարցեր»,- չորեքշաբթի մամուլի ասուլիսի ժամանակ ասաց Վարդանյանը: -0-
