ԵՐԵՎԱՆ, 19 մարտի. /Նովոստի-Արմենիա/. Արցախի Հանրապետության նախագահ Բակո Սահակյանը ուրբաթ ընդունել է Երևանի կոնյակի գործարանի գործադիր տնօրեն Արա Գրիգորյանին, տեղեկացնում է ԼՂՀ նախագահի աշխատակազմի տեղեկատվության գլխավոր վարչությունը։
Ինչպես նշվում է հաղորդագրությունում, հանդիպման ընթացքում անդրադարձ է կատարվել գործարանի կողմից 2009 թվականին Արցախում իրականացված աշխատանքներին և 2010 թվականի անելիքներին:
«Երկրի ղեկավարը կարևորել է Երևանի կոնյակի գործարանի դերը հանրապետության խաղողագործության զարգացման գործում` ընդգծելով, որ անհրաժեշտ է ավելի համակարգված ու երկարաժամկետ դարձնել գործարանի ներգրավվածությունը մեր տնտեսության մեջ»,- նշվում է մամուլի հաղորդագրությունում։
Հանդիպմանը ներկա է եղել նաև ԼՂՀ վարչապետ Արա Հարությունյանը: -0-
