ԵՐԵՎԱՆ, 24 մարտի. /Նովոստի-Արմենիա/. ԵվրԱզԷՍ-ի անդամ-պետություններում և Հայաստանի Հանրապետությունում ներդրումներին ու տեխնոլոգիաների փոխանցմանն աջակցելու նպատակով ՄԱԿ-ի արդյունաբերական զարգացման (ՅՈՒՆԻԴՕ) գրասենյակների ցանցի ստեղծման նախագծի փաստաթղթերի փաթեթը երեքշաբթի ստորագրվել է Վիեննայում միջազգային կազմակերպություններում ՌԴ-ի մշտական ներկայացուցչության շենքում, հաղորդում է «ՌԻԱ Նովոստիի» թղթակիցը:
Փաստաթղթերը ստորագրել են Ռուսաստանի մշտական ներկայացուցիչ Ալեքսանդր Զմեևսկին և ՅՈՒՆԻԴՕ-ի գլխավոր տնօրեն Կանդե Յումքելան: Արարողությանը նաև մասնակցել են ԵվրԱզԷՍ-ի երկրների և Հայաստանի դեսպանները:
«Այս նորարարական նախագիծը նախատեսված է երեք տարվա համար և դրա իրագործման արդյունքում ԵվրԱզԷՍ-ի տարածքում պետք է ձևավորվի գործընկեր-հաստատությունների կայուն ցանց, որոնք ուղղված կլինեն ներդրումներ ներգրավելուն, տեխնոլոգիաների փոխանցմանն ու բարձր որակավորում ունեցող կադրերի պատրաստմանը», - արարողության ժամանակ ասել է Զմեևսկին:
Նրա խոսքերով՝ «արդեն շուտով սպասվում է ՅՈՒՆԻԴՕ-ի ևս երեք նախագծերի գործարկումը, որոնք կֆինանսավորի Ռուսաստանը Արդյունաբերական զարգացման հիմնադրամ ամենամյա կամավոր անդամավճարների միջոցներից»:
Ռուսաստանի մշտական ներկայացուցիչն ընդգծել է, որ նման կերպ ՅՈՒՆԻԴՕ-ի հետ փոխգործակցության նոր ձևաչափի պրակտիկ սկիզբ է դրվում, որում Ռուսաստանը հանդես է գալիս որպես միջազգային զարգացման դոնոր:-0-
