Ծավի խմելու ջուրն անվտանգ է․ սնդիկի պարունակությունը չի գերազանցում թույլատրելի մակարդակը․ ԱՆ
ԵՐԵՎԱՆ, 28 հոկտեմբերի․ /Նովոստի–Արմենիա/․ Ծավ գյուղի ջրի նոր նմուշառումներով իրականացված հետազոտությունների արդյունքներով արձանագրվել է, որ խմելու ջրում սնդիկի պարունակությունը չի գերազանցում սահմանված առավելագույն թույլատրելի մակարդակը, և այն անվտանգ է՝ խմելու և կենցաղային նպատակներով օգտագործման համար, հայտնում են Առողջապահության նախարարությունից։
Գերատեսչության փոխանցմամբ՝ սեպտեմբերի սկզբին ստացվել էր Ծավ բնակավայրի խմելու ջրի որակի վերաբերյալ ահազանգ, ինչի կապակցությամբ իրականացված մոնիտորինգի ընթացքում արձանագրվել էր սնդիկի պարունակության սահմանված առավելագույն թույլատրելի մակարդակի գերազանցման վերաբերյալ նախնական եզրակացություն։
Մինչև ջրի որակի վերաբերյալ վերջնական եզրակացության ստացումը, բնակչության առողջության համար հնարավոր ռիսկերը կանխելու նպատակով, բնակավայրի բնակչությունն անմիջապես ապահովվել էր անվտանգ խմելու ջրի մատակարարմամբ և սահմանափակվել էր ենթադրյալ վտանգավորություն ունեցող ջրի կենցաղային օգտագործումը։
Անցյալ ավելի մեկուկես ամսվա ընթացքում ջրի որակի համակողմանի ուսումնասիրության և խորը մասնագիտական գնահատման նպատակով կազմվել էր Միջգերատեսչական մասնագիտական հանձնաժողով, որի համակարգմամբ ձևավորված մասնագիտական խմբի կողմից իրականացվել են նոր հետազոտություններ` նպատակ ունենալով դրանք իրականացնել սահմանված պահանջների բարձր համապատասխանությամբ և բացահայտել վտանգի հնարավոր աղբյուրը։
«Մասնագիտական խմբի կողմից իրականացվել են ջրի նոր նմուշառումներ ու նմուշապատրաստում, և դրանց մի շարք լաբորատոր հետազոտություններ ինչպես ՀՀ-ում, այնպես էլ արտերկրում գործող տարբեր լաբորատորիաներում։
Միջգերատեսչական հանձնաժողովի համակարգմամբ իրականացված հետազոտությունների արդյունքներով արձանագրվել է, որ խմելու ջրում սնդիկի պարունակությունը չի գերազանցում սահմանված առավելագույն թույլատրելի մակարդակը։
Հաշվի առնելով վերոգրյալը՝ Ծավ բնակավայրի ջուրը, ըստ սնդիկի պարունակության ցուցանիշի, համարվում է անվտանգ՝ խմելու և կենցաղային նպատակներով օգտագործման համար», - նշված է հաղորդագրության մեջ։
Նախարարությունից նշում են, որ խմելու ջրի մոնիտորինգը կրելու է շարունակական բնույթ:
Հիշեցնենք, որ սեպտեմբերի կեսերին ՀՀ առողջապահության նախարարությունը հայտնել էր, որ Ծավ գյուղի խմելու ջրում սնդիկի պարունակությունը գերազանցել է սահմանային թույլատրելի մակարդակը։ Բնակիչներից մեկը հայտնել էր, որ իր տան ծորակից հոսող ջրում մետաղական զանգված է նկատել։ Տուժածներ չեն եղել, սակայն գերատեսչությունը բնակիչներին կոչ է արել մինչև ջրի որակի վերականգնումը ջուրը չօգտագործել խմելու և կենցաղային նպատակներով։
