Սլովենիայի ԱԳ նախարարը նշել է Հայաստանի եվրոպական ինտեգրման հիմնական պայմաններն ու գնահատել գրանցած առաջընթացը

ԵՐԵՎԱՆ, 28 հոկտեմբերի․ /Նովոստի–Արմենիա/․ Օրենքի գերակայությունը, անկախ դատական համակարգը և պետական վարչարարական ոլորտներում բարեփոխումների իրականացումը վճռորոշ նշանակություն ունեն Հայաստանի եվրոպական ինտեգրման համար:

Այս մասին հայտարարել է Սլովենիայի արտաքին և եվրոպական գործերի նախարար Տոնե Կայզերը Երևանում Հայաստանի արտաքին գործերի և միջազգային առևտրի նախարար Արարատ Միրզոյանի հետ համատեղ ասուլիսում:

Պատասխանելով այն հարցին, թե ինչ դասեր է քաղել Սլովենիան ԵՄ-ին անդամակցելու ճանապարհին և ինչ փորձ կարող է փոխանցել Հայաստանին, Կայզերն ընդգծել է օրենքի գերակայության առանձնահատուկ կարևորությունը:

«Իսկապես անկողմնակալ դատական համակարգ պետք է ունենալ, որպեսզի ժողովուրդը զգա, որ բոլորը հավասար են օրենքի առջև», - նշել է նա:

Նախարարի խոսքով՝ Սլովենիայից պահանջվել է մեծ բարեփոխումներ իրականացնել առողջապահության, կրթության և պետական վարչարարության համակարգերում, որպեսզի դրանք համապատասխանեցվեն անհրաժեշտ չափանիշներին:

Կայզերը հիշեցրել է, որ շուրջ 35 տարի առաջ, երբ Սլովենիան դեռ Հարավսլավիայի կազմում էր, նրա քաղաքացիները հանրաքվեում ճնշող մեծամասնությամբ աջակցեցին ժողովրդավարական բարեփոխումներին, օրենքի գերակայությանը և տնտեսական ազատությանը:

Դրանից հետո երկիրը հայտարարել է Եվրոպական միության անդամ դառնալու հավակնությունների մասին և սկսել բարեփոխումների երկարատև գործընթաց, որն ավարտվել է 2004 թվականին ԵՄ-ին անդամակցությամբ:

Նախարարն ընդգծել է նաև Twinning ծրագրերի կարևորությունը, որոնց շրջանակում ԵՄ անդամ երկրները փորձի փոխանցում և փորձագիտական աջակցություն են տրամադրում պետական ինստիտուտներին: Նրա խոսքով՝ Հայաստանի հետ համագործակցության այս ուղղությանը պետք է առավել մեծ ուշադրություն դարձնել:

Ընդ որում, Կայզերն ընդգծել է, որ եվրոպական ինտեգրման հիմքը պետք է լինի ժողովրդի կամքը:

«Ամեն ինչի հիմքում պետք է ընկած լինի ժողովրդի կամքը։ Անշուշտ, շատ պարզ է․ մենք ամեն ինչ անում ենք ժողովրդի համար, ուստի պետք է լսենք ժողովրդին։ Ժողովրդի խոսքը պետք է լինի առաջնային ժողովրդավարության մեջ», - հայտարարել է նախարարը:

Նա դրական է գնահատել Հայաստանի քայլերը եվրոպական ինտեգրման ուղղությամբ և հաստատել Սլովենիայի աջակցությունը:

«Կարծում եմ՝ Հայաստանը շատ լավ առաջընթաց է գրանցում, և մենք աջակցում ենք դրան», - ասել է Կայզերը:

Սլովենիան Եվրոպական միության անդամ է դարձել 2004 թվականի մայիսի 1-ին՝ ԵՄ ամենախոշոր ընդլայնման շրջանակներում:

Կայզերը հոկտեմբերի 28-29-ին գտնվում է Երևանում: Սլովենիայի ԱԳՆ պաշտոնական հաղորդագրության համաձայն՝ բանակցությունների օրակարգում ընդգրկված են քաղաքական և տնտեսական համագործակցության զարգացումը, ինչպես նաև արտաքին քաղաքական հարցերը: